Örn Bárður Jónsson – and "BARD-art"

Grein eftir Örn Bárð Jónsson sem les

Hvað veldur þessum faraldri í heiminum sem birtist í kynusla samtímans?

Við eigum heimildir um líf fólks á jörðinni um aldir og árþúsund. Hvernig getur það gerst á örfáum árum, að þessi gríðarlega breyting komi allt í einu fram eins og stökkbreyting? Er eitthvað í fæðunni? Í vatninu?

Það þarf enginn að segja mér að þessi kynuslakláði hafi bara verið bældur niður af vondu fólki og illgjörnum stjórnvöldum í gegnum aldirnar og því sé fólk komið út úr skápnum, loksins þegar tíðarandinn gaf leyfi fyrir slíku. Sem drengur í 2500 manna kaupstað þar sem samskipti voru mikil og allir þekktu alla, var enginn urmull af samkynhneigðum. Við þekktum fyrirbrigðið, vorum engir bjánar. Hvað veldur því að allt í einu er þetta orðið að stórmáli um allan hinn vestræna heim? Já, Nota Bene, hinn vestræna heim! Hvað veldur? Getur verið að vandinn sé huglægur og snúist um hugmyndafræði?

Alþingismaðurinn, Snorri Másson, mætir í Kastljós Sjónvarpsins og leggur fram sínar efasemdir um málið og hann er í kjölfarið tekinn andlega af lífi af fólki sem ryðst fram á völlinn með lensur, spjót og brugðna branda, eins og villidýr, froðufellandi af mannvonsku og brjálæði, fólk sem þarf virkilega að skoða framkomu sína og kannski ræða við fræðinga sem kunna skil á frávikum í geðslagi og kvillum í geðgörðum sálarinnar. Hvað er að á þeim grænu grundum? Eða eru þær grundir kannski sem sviðin jörð, sviðnar af skrælnandi fordómum?

Við vitum að samfélagsmiðlar hafa áhrif á fólk, en vitum við hversu stór sú mengun er. Já, ég tala hér um mengun hugans sem kemur m.a. fram í múgsefjun. Þetta kunnu áróðursmeistarar fyrir daga Alnetsins.

Trúgirni kemur glöggt fram í kynjaumræðunni. Þar er því haldið fram að kynin séu mörg og að það sé vísindalega sannað.

Getur það virkilega verið að stærstur hluti almennings gefi sér foresendur og búi til sínar eigin „vísindalegu“ kenningar til að lifa eftir og trúa á? Og ef einhver vogar sér að setja spurningarmerki við þá „vísindalegu“ fullyrðingu, stíga fram stjórnmálamenn, forystufólk á ýmsum sviðum og öskrar eins og forðum í Jerúsalem: Krossfestu hann, krossfestu hann.

Vísindin

Skoðum snöggvast hvað þekktir vísindamenn segja um kynin.

Kynjaumræðan er heit og ekki einfalt að átta sig á öllum staðreyndum þar.

Richard Dawkins, er þróunarlíffræðingur og vísindamaður, fv. prófessor við Oxford, heimsþekktur guðleysingi, sem ég hef leyft mér að kalla „páfa“ fólks sem er þeirrar trúar. Hann nýtur frægðar og hefur þetta að segja um kyn fólks:

„Kynin eru í raun tvíund“ (binary)

– sem merkir: kynin eru bara tvö – og svo segir hann:

„börn verða að transfólki vegna þrýstings frá kennurum og jafnöldrum sínum.“

(https://en.wikipedia.org/wiki/Views_of_Richard_Dawkins#:~:text=In a podcast with Helen,from their teachers and peers.)

Þetta segir Dawkins.

Hér nefni ég annan vísindamann.

Dr. Christiane Nüsslein-Volhard, líffræðingur og Nóbelsverðlaunahafi, segir:

„Öll spendýr hafa tvö kyn.“

Þau eru m.ö.o. annaðhvort karlkyns eða kvenkyns.

Hún var fyrst þýskra kvenna til að hljóta Nóbelsverðlaun í raunvísindum.

Möguleikinn á að framleiða stórar eða litlar kynfrumur (gamíða) aðgreinir okkur fullkomlega í tvö kyn, samkvæmt hennar niðurstöðum.

Og hér er tafla sem sýnir að öll dæmin um ólík fyrirbrigði eru annað hvort karl eða kona. Engin frávik finnast.

Gervivísindi

Svo eru til „vísindamenn“ sem koma með eitthvað annað. Sumt stenzt, annað ekki. Standast skrif líffræðinga slíka gagnrýni, almennt talað? Hvað með fræðimenn við HÍ?

Er unnt að draga þá ályktun af þessum niðurstöðum vísinda að „kynuslinn“ heyri alfarið undir svið sálar- og geðlæknisfræði?

Hvers vegna þola áróðursvélar nýju „siðbreytingarinnar“ ekki vísindaleg rök? Nú nota ég kirkjulegt hugtak, því Þjóðkirkjan hefur umfaðmað þessa siðbreytingu.

Nú verð ég án efa dæmdur fyrir að vera hommahatari og dólgur gegn transfólki og allt það en ég get auðveldlega skotið í kaf alla slíka fordóma með hreinum rökum og dæmum.

Þá er önnur hætta á bak við næsta horn, ef maður veltir þessum hlutum fyrir sér og kemur með óþægilegar niðurstöður. Nefnilega sú, að maður verði dæmdur sem öfgamaður, þröngsýnn fylgjandi úreltra trúarbragða og svo framvegis.

Kommarnir, vinstrið og ekki síst kampavíns-kommarnir, eru farnir að tala um kristnina á þessum nótum, að hún sé með úrelta hugmyndafræði.

Gleymum aldrei að grunnur vestrænnar sýnar á manneskjuna, á mannréttindi, á réttindi og skyldur, helgi mannlífs, réttarfar, lýðræði, dómstóla, fangelsismál, jafnrétti – ALLT! – er það komið úr gyðing/kristnum jarðvegi með grísk-fílósófísku ívafi.

Öll meginhugsun Vesturlanda á rætur í Ísrael – í fræðum gyðinga og Jesú Krists!

Skoðanir og varhugaverð rök

Biskup Íslands, Guðrún Karls Helgudóttir, fer mikinn í vörn í kynjaumræðunni, enda brennur það á hennar eigin skinni. En að fullyrða að fólk sem er ekki sömu skoðunar og tíðarandinn og hefur efasemdir um kynuslann, að það geri sig sekt um að fjölga sjálfsvígum, er stórhættulegur og kolrangur málflutningur.

Sjálfsvíg eru og hafa aldrei verið neinum að kenna nema þeim sem það fremja.

Ég hef þurft að hugga fólk þá áragtugi sem ég hef þjónað sem prestur, fólk sem misst hefur ástvin vegna sjálfsvígs og verið með sjálfásakanir og spurningar eins og t.d.: Hvað ef? Hvað ef ég hefði verið betri? Gert þetta eða hitt? Allar slíkar spurningar eru eðlilegar – en við þeim er ekkert svar nema þetta: Enginn ber ábyrgð á sjálfsvígi nema gerandinn sjálfur.

Það er beinlínist rangt að ásaka fólk, sem setur eðlilegar spurnignar við kynuslann, að það valdi dauða annarra. Það er kolrangt!!!!!! Og hér varð ég að setja sex upphrópunarmerki.

Kyn

Ég hef jarðsungið samkynhneigða einstaklinga og huggað samkynhneigða og allt það – og án allra fordóma eða manngreinarálits. Ég hef heimsótt Samtökin 78 og fræðst um þeirra málstað, lesið bækur, kynnst fólki, sem glímir við spurningar um eigin kynvitund og þekki suma náið.

Sumir segja að þrýstingur sé á börn um að þau eigi að efast um eigið kyn og leita annars. Sé það rétt þá boðar það ekki gott. Það er miður að kynjamálin skuli snúast að hluta til um áróður sem ekki byggir á rannsóknum vísinda.

Fólk hefur auðvitað frelsi til að kanna eigin kynvitund og leita að sjálfu sér. Fyrst vísindin eru með það á hreinu að kynin séu bara tvö og að engin rök séu fyrir öðru, má ætla að kynuslinn flokkist alfarið undir svið sálfræði og/eða geðlæknisfræði.

En áróðursvél regnbogans er keyrð á fullu afli allan sólahriginnn, allt árið um kring! En maður verður að vona að fjölmiðlar og netheimar séu ekki eingöngu fullir af gervivísindum og dellumakeríi sem afvegaleiðir fólk heldur að þar sé líka heilbrigð umræða á vísindalegum forsendum.

Að reka fjölmiðil eins og t.d. Rúv er dauðans alvara. Allar fréttir sem sagðar eru í fréttatímum eru valdar af fréttastjórum og fréttamönnum, körlum og konum. Þetta fólk er ekki hlutlaust eða skoðanalaust. Þetta fólk velur fréttir og raðar þeim í forgangsröð og þar kunna eigin skoðanir þeirra að hafa áhrif. Vald þeirra er gríðarlegt og ábyrgðin gígantísk. Gætum vel að því fjöreggi sem fjölmiðlun er!

Og fjölmiðlarnir hafa sín áhrif. Staðreyndin er sú að massinn þorir ekki annað en að hlunkast með trendinu sem boðar hitt og þetta, sem í sumum tilfellum er kennt við vísindi en er í raun algjör gervivísindi.

Andhæris

Mikilvægt er að við lærum að elska hvert annað, hver sem vitund okkar kanna að vera um okkur sjálf. Hvort sem við byggjum líf okkar á vísindalegum staðreyndum eða staðlausun stöfum.

Elskum líka þau sem eru á annarri skoðun. Líka Snorra Másson. Líka þetta öfgafulla fólk á Austurvelli með sínar skoðanir, líka transfólk, homma og lesbíur, allt fólk, hver sem kynvitundin kann að vera, eða pólitískar hugmyndir eða hreinar ranghugmyndir.

Snorri Másson þorði að segja sína skoðun í Kastljósi og mótaðilinn, Þorbjörg Þorvaldsdóttir, verkefnastýra Samtakanna 78, hafði sína og setti sitt mál fram m.a. með niðrandi hlátri í garð Snorra, sem er dæmi um yfirlæti og hroka.

Þáttastjórnandinn réð hins vegar ekki við að vera hlutlaus spyrjandi. Hann tók afstöðu.

Umræðan er eldfim og vandmeðfarin.

Og Snorri er útmálaður sem fífl og öfgamaður.

Hann er hugrakkur maður að þora að fara á móti mótmælamassanum, sem er með allt sitt hafurtask í ómældum stærðum og með galopinn aðgang að öllum fjölmiðlum og telur sig vita allt og vita betur en færustu vísindamenn veraldar. Já, fólk sem er svona visst í sinni sök er beinlínis hættulegt og þegar einhverjum verður það á að strjúka slíkum villiköttum andhæris, setja þeir klær sínar virkilega í aksjón, bíta og klóra til bóðs.

Þessi tryllti æsingur fær mann til að leiða hugann að helztu aðgerðum í sögunni og dæmi um fjöldafíflun. Ég nefni aftur Þýzkaland nazismans, Sovétríkin og alla kommúnistablokkina.

Það er ljótt að leyfa engum að hafa aðra skoðun en manns eigin!

Ef þú ert í þeim hópi, þá þarftu hjálp, í fyrsta lagi frá rökfræðinni og ef hún dugar ekki, væri gott að tala við þá frændur, Sálmund eða Geðmund.

Léleg rök og hættuleg hugmyndafræði

Engin veggur er til án tveggja hliða. Þú sefur í rúmi innan fjögurra veggja og það er önnur hlið á hverjum vegg. Meira að segja hefur frístandandi veggur úti á víðavangi á sér tvær hliðar. Þú getur að vísu valið hvorum megin veggjar þú hefur beddann þinn.

Forðastu fólk sem hefur fundið upp einhliða vegg, einhliða mynt, eina skoðun. Slíkir einstaklingar eru hættulegir.

Þeir eru þekktir í sögunni og massinn sem þeir fífluðu, er líka þekktur og skilgreindur. Og sá massi, þeir massar, gengu taktföstum skrefum í gljáfægðum stígvélum, beinustu leið til andskotans. Ég nefni nokkra útópíska ídealista og illvirkja:

Stalín, Hitler, Mussólíni, Maó, Pol Pot.

Vörumst slíka kóna.

Afstaða til samkynhneigðra og transfólks

Hér vil ég taka það skýrt fram að þessi tilraun mín til að benda á niðurstöður vísinda og að í umræðunni um málefni samkynhneigðra og transfólks kunni að skorta vísindalegar sannanir, þá að sjálfsögðu viðurkenni ég tilvist fólks sem upplifir sig í „röngum líkama“ eða finnur sig hafa aðra kynhneigð en viðkomandi hélt áður. Og ég ætla að skrifa það með stórum stöfum: MÁLFLUTNINGUR MINN SNÝST EKKI UM AÐ AFNEITA FÓLKI MEÐ AÐRA KYNVITUND EN ÉG HEF, HELDUR AÐ VIÐURKENNA ÞAÐ OG VIRÐA, BURT SÉÐ FRÁ ÞVÍ HVORT VÍSINDIN KUNNI AÐ STAÐFESTA ÞEIRRA TRÚ EÐA EKKI.

Þeir vísindamenn, sem ég hef vitnað til og koma úr ólíkum áttum og hafa ólíkar lífsskoðanir, segja að þarna skorti vísindaleg rök. Þess vegna hef ég ítrekað sagt að við eigum að fara í boltann en ekki manninn, í vísindin en ekki fólkið.

Kærleikurinn sigrar allt

Við eigum að elska alla, en þurfum ekki endilega að elska allar skoðanir. Förum í boltann, kenninguna sjálfa, með vísindin að vopni, vitræna hugsun og greinandi vit og heilbrigða trú, en forðumst að fara í manneskjuna.

Gætið ykkar, þið sem eruðu svo viss í ykkar sök, örugg í ykkar trú, varist gífuryrði og dómsýki, en reynið að feta ykkur áfram með rökhugsun og yfirvegun.

Við höfum flest farið framúr okkur einhverntímann í hita leiksins. Lærum af því.

Allt fólk er dýrmætt.

Leitumst við að virða þau sem ekki eru okkur sammála. Förum í málefnið en ekki manninn.

Virðum fólk sem hefur fundið nýjar víddir í sálu og líkama og komið „út úr skápnum“ eins og það er kallað. Mestu skiptir að þau og við séum öll góðar og heiðarlegar manneskjur. Gerum ekki botnlausan og rakalausan gervisannleik úr slíkri glímu fólks við veruleikann og búum ekki til ósannaðar vísindakenningar þar um. Að finna sjálfan sig og styrkja sjálfsmynd sína er verkefni sem endist okkur flestum alla ævina.

Eitt er víst, við sem teljumst vera menn, mannverur, erum öll sömu ættar í raun.

Að baki tilverunni er ein vitund – sem er elska, miskunn, fyrirgefning og náð.

Að lokum eru orð sem gott er að íhuga. Þau voru mælt af Jesú Kristi í Ísrael fyrir tvöþúsund árum og eru enn í fullu gildi. Enginn ein manneskja hefur haft meiri áhrif á þennan heim til góðs en hann:

Af ávextinum þekkist tréð

33 Annaðhvort er tréð gott og ávöxturinn góður eða tréð vont og ávöxturinn vondur. Því af ávextinum þekkist tréð. 34 Þér nöðrukyn, hvernig getið þér, sem eruð vond, talað gott? Af gnægð hjartans mælir munnurinn. 35 Góður maður ber gott fram úr góðum sjóði en vondur maður ber vont fram úr vondum sjóði.
36 En ég segi yður: Á dómsdegi munu menn verða að svara fyrir hvert ónytjuorð sem þeir mæla. 37 Því af orðum þínum muntu sýknaður og af orðum þínum muntu sakfelldur verða.“ (Matt 12.33-37)

Orð Jesú verða aldrei úrelt.

Gætið ykkar á „trú“ þeirra sem boða þá firru að orð Jesú séu útrunnin eins og gamalt álegg!

Sá dagur mun renna upp að við munum öll sjá það ritað skýrum stöfum á sjálfa himinfestinguna, að hann hafði rétt fyrir sér í öllu!

Trúðu ekki hverju sem er.

Þakka þér fyrir að lesa og/eða hlusta.

Góðar stundir.